ՀԱՄԱՍ խմբավորումը սպառնում է ռմբակոծել իսրայելական քաղաքները

Պաղեստինյան ՀԱՄԱՍ խմբավորումը սպառնացել է Թել Ավիվին, որ կռմբակոծի իսրայելական քաղաքները, եթե հրեական պետության բանակը չդադարեցնի Գազայի հատվածում ռազմական գործողությունները։ Այս մասին գրում է TASS-ը՝ հղում կատարելով Associated Press գործակալությանը։

ՀԱՄԱՍ խմբավորման ներկայացուցիչ Աբու Ուբեյդայի խոսքով՝ իսրայելական Աշդոդ և Բեեր Շևա քաղաքները կարող են դառնալ թիրախ, եթե «թշնամին (Իսրայելը) շարունակի ռմբակոծել բնակելի շենքերը»։ Նա հավելել է նաև, որ Աշկելոն քաղաքը իրենց խմբավորման հրթիռների խոցման շառավիղում է։

Նոյեմբերի 12-ի երեկոյան պաղեստինյան զինված խմբավորումները Գազայի հատվածից հրթիռակոծել են Իսրայելի տարածքը՝ ի պատասխան պաղեստինյան անկլավում հրեական պետության հատուկ ջոկատի իրականացրած ռազմական գործողությունների։ Պաղեստինցի ծայրահեղականները շուրջ 370 հրթիռ են արձակել Իսրայելի ուղղությամբ, որոնցից 100-ը խոցվել է «Երկաթե գմբեթ» համակարգի կողմից։

Իսրայելի բանակի մամուլի ծառայության փոխանցմամբ՝ վերջին ժամերի ընթացքում իսրայելական կործանիչները, ռազմական ուղղաթիռները և տանկերը Գազայի հատվածում խոցել են ՀԱՄԱՍ խմբավորման շուրջ 70 թիրախ։