ԱՄՆ-ի գլխավորած կոալիցիան հարվածներ է հասցրել Դեր Զորի բնակավայրերին
ԱՄՆ-ի գլխավորած միջազգային կոալիցիան կասետային ռումբերով հարվածներ է հացրել սիրիական Դեր Զոր նահանգին։ Այս մասին գրում է Lenta-ն՝ հղում կատարելով SANA գործակալությանը։
Աղբյուրի փոխանցմամբ՝ տուժել են Հաջին և Շաաֆ բնակավայրերի բնակիչները։ Հաղորդվում է զոհերի և վիրավորների մասին, սակայն նրանց կոնկրետ թիվը չի նշվում։
SANA-ի աղբյուրները վստահ են, որ ամերիկյան կոալիցիան դիտմամբ է ռմբակոծել բնակելի շենքերը՝ հարվածները քողարկելով Իսլամական պետության դեմ պայքարի ներքո։
Ավելի վաղ SANA գործակալությունը հայտնել էր, որ կոալիցիայի հարվածների հետևանքով Շաաֆ բնակավայրում զոհվել և վիրավորվել է 60 մարդ։
Հոկտեմբերի 16-ին Սիրիայում հակամարտող կողմերի հաշտեցման ռուսական կենտրոնի ղեկավար Վլադիմիր Սավչենկոն հայտարարել էր, որ Միացյալ Նահանգները և Պենտագոնի աջակցությունը վայելով քրդական զորամիավորումներն իրականում ձևացնում են, թե պայքարում են ԻՊ-ի դեմ։ Նրա խոսքով՝ ամերիկամետ ուժերի անգործության հետևանքով ահաբեկիչներն այժմ վերահսկողություն են հաստատել Եփրատ գետի արևելյան ափի երկայնքով շուրջ 20 կիլոմետր։