Թրամփի հայտարարությունների պատճառով Պակիստանում ԱՄՆ գործերի հավատարմատարը կանչվել է ԱԳՆ․ Reuters
![](https://www.noror.am/sites/default/files/styles/header_image/public/header-images/pakistan.jpg?itok=XTiSCaw2)
Պակիստանի արտաքին գործերի նախարար Շահ Մեհմուդ Կուրեշին իր մոտ է հրավիրել Իսլամաբադում ԱՄՆ գործերի հավատարմատարին, որպեսզի իր դժգոհությունը հայտնի ԱՄՆ նախագահ Դոնալդ Թրամփի՝ Պակիստանին ուղղված կտրուկ հայտարարությունների վերաբերյալ։ Այս մասին տեղեկացնում է Reuters գործակալությունը։
«Արտաքին գործերի նախարարն իր մոտ է հրավիրել ԱՄՆ գործերի հավատարմատար Փոլ Ջոնսին, որպեսզի իր վճռական բողոքն արտահայտի Պակիստանի հասցեագրված անհիմն և մերկապարանոց հայտարարությունների վերաբերյալ», - ասվում է Պակիստանի ԱԳՆ-ի մամուլի ծառայության տարածած հաղորդագրության մեջ։
Ավելի վաղ Fox News-ին տված հարցազրույցի ժամանակ Դոնալդ Թրամփը հայտարարել էր, որ Իսլամաբադը ոչինչ չի անում ահաբեկչության դեմ պայքարում Վաշինգտոնին օգնելու համար։ Բացի այդ, ԱՄՆ նախագահը նշել է, որ Պակիստանն իր տարածքում թաքցրել է ահաբեկիչների, մասնավորապես՝ «Ալ Կաիդա» խմբավորման առաջնորդ Ուսամա բեն Լադենին։ Թրամփն իր թվիթերյան էջում գրել էր, որ Պակիստանն այն երկիրն է, որը ԱՄՆ-ից վերցրել է շատ բան, բայց փոխարենը ոչինչ չի տվել։
Ի պատասխան՝ Պակիստանի վարչապետ Իմրան Խանն իր թվիթերյան էջում հերքել էր Թրամփի պնդումները։ Նրա խոսքով՝ Պակիստանը 2001 թ․ սեպտեմբերի 11-ի ահաբեկչությունից հետո միացել էր ամերիկյան բանակին և վերջինիս հետ պայքարում էր միջազգային ահաբեկչության դեմ։ Նրա խոսքով՝ այդ կռվում իրենք կորցրել են շուրջ 75 հազար մարդ։
Վաշինգտոնի և Իսլամաբադի միջև հարաբերությունները սրվել են 2017 թ․ օգոստոսից, երբ Միացյալ Նահանգները հրապարակեց Հարավային Ասիայում և Աֆղանստանում իր նոր ռազմավարությունը։ Այդ ժամանակ Պակիստանը մեղադրվեց ծայրահեղական կազմակերպություններին օգնելու մեջ, որոնք Աֆղանստանում գործում էին ԱՄՆ-ի և վերջինիս դաշնակիցների դեմ։ 2018 թ․ հունվարին ԱՄՆ պետքարտուղարությունը հայտարարեց, որ դադարեցվում է Պակիստանին հատկացվող ռազմական օգնությունը այնքան ժամանակ, քանի դեռ Իսլամաբադը միջոցներ չի ձեռնարկել ծայրահեղական խմբավորումների դեմ վճռական պայքար սկսելու ուղղությամբ։ Սեպտեմբերի 2-ին Վաշինգտոնը վերջնականապես կասեցրեց 300 միլիոն դոլարի օգնության տրամադրումը Իսլամաբադին։