Ցանցահենները կապ են գտել Ալեքսեյ Նավալնիի գործընկերոջ և բրիտանական հետախուզության միջև

Anonymous կոչվող հաքերային խումբը հայտարարել է փաստաթղթերի բացահայտման մասին, որոնք լույս են սփռում Integrity Initiative անունը կրող ծրագրի գործունեության վրա, որը, ենթադրաբար, Լոնդոնն օգտագործել է եվրոպական երկրների ներքին գործերին միջամտելու համար։ Այս մասին գրում է Ռիա նովոստի-ն՝ հղում կատարելով խմբավորման կայքին։

Anonymous-ը այս ծրագիրն անվանում է «հատուկ ծառայություն»։ Integrity Initiative-ի ծախսերը ընթացիկ ֆինանսական տարում, որն ավարտվում է 2019 թ․ մարտի 31-ին, գնահատվում են 1,96 միլիոն ֆունտ ստերլինգ (2,51 միլիոն դոլար)։

«Բարեգործական նպատակների քողի տակ Բրիտանիան Եվրոպայում, ԱՄՆ-ում և Կանադայում ստեղծել է մեծ գաղտնի ծառայություն՝ բաղկացած քաղաքական, ռազմական, ակադեմիական և լրագրողական շրջանակներից։ Ծրագրի հայտարարված նպատակը Ռուսաստանին տեղեկատվական հարթակում հակազդելն է։ Integrity Initiative-ը դրամաշնորհներ է ստացել ԱՄՆ պետքարտուղարությունից և ՆԱՏՕ-ից», - գրում է Anonymous-ի կայքը։

Նշվում է, որ ծրագրով գործողություններ են իրականացվում Իսպանիայում, Ֆրանսիայում, Գերմանիայում, Իտալիայում, Հունաստանում, Նիդերլանդներում, Լիտվայում, Նորվեգիայում, Սերբիայում և Չեռնոգորիայում։

Anonymous-ի տվյալներով՝ այդ ծրագրի համար աշխատողների թվում են ֆինանսիստ Վիլիամ Բրաուդերը և Վլադիմիր Աշուրկովը, որն Ալեքսեյ Նավալնիի գործընկերն է։ Բացի այդ՝ ցուցակում հիշատակվում են բրիտանական բանակի կիբերստորաբաժանումը՝ 77-րդ բրիգադը։ Ավելի վաղ Wired թերթը գրում էր, որ Բրիտանիայի Զինված ուժերի 77-րդ բրիգադը զբաղվում է ապատեղեկատվության տարածմամբ և գործողություններ է իրականացնում ոչ զինվորականների անունից։

Ստացված փաստաթղթերն առաջինն իր Telegram-ի ալիքում հրապարակել էր Russia Today լրատվականը։ Երբ RT-ն այս տեղեկությունը հրապարակեց նաև Twitter-ում, միգրոբլոգը սպառնաց արգելափակել էջը, եթե այդ թվիթը չհեռացվի։

Նավալնիի գործընկերը՝ կոռուպցիայի դեմ պայքարի ֆոնդի նախկին ղեկավար Վլադիմիր Աշուրկովը, 2015 թ․ հայտարարել էր, որ քաղաքական ապաստան է ստացել Մեծ Բրիտանիայում։ Բրիտանիայի ներքին գործերի նախարարությունն այն ժամանակ հրաժարվել էր հաստատել կամ հերքել այդ տեղեկությունը։ Աշուրկովը անցնում է նաև Նավալնիի գործունեության հետ կապված քրեական գործով։

Վիլիամ Բրաուդերը միջազգային ֆինանսիստ և ներդրող է, աուդիտոր Սերգեյ Մագնիտսկիի նախկին գործատուն։ Նա 1995-2007 թ․թ․ եղել է Ռուսաստանի խոշորագույն ներդրողը։ Այժմ ապրում է Լոնդոնում։ Ռուսաստանի իրավապահները նրա նկատմամբ հայտարարել են միջազգային հետախուզում։

Մեծ Բրիտանիայի արտաքին գործերի նախարարությունը, մեկնաբանելով Integrity Initiative-ի վերաբերյալ փաստաթղթերի հրապարակումը, նշել է, որ այն միշտ էլ բաց և հասանելի է եղել բոլորի համար։

ՌԴ Պետդումայի արտաքին հարաբերությունների հանձնաժողովի ղեկավար Կոնստանտին Կոսաչովը կարծում է, որ ստացված տեղեկությունները պետք է մանրակրկիտ քննության ենթարկվեն։ Մեկ այլ պատգամավոր Օլեգ Մորոզովի խոսքով՝ այդ փաստաթղթերը ևս մեկ անգամ ապացուցում են, որ Ռուսաստանի ընդդիմադիր ուժերը կապ ունեն արտասահմանյան տարբեր կենտրոնների հետ։