ԱՄՆ Սենատը դատապարտում է Ռուսաստանի գործողությունները Կերչի նեղուցում

ԱՄՆ Կոնգրեսի Սենատը միաձայն հավանության է արժանացրել մի բանաձև, որը դատապարտում է Կերչի նեղուցում տեղի ունեցած միջադեպի ժամանակ Ռուսաստանի գործողությունները։ Այս մասին գրում է ՏԱՍՍ-ը՝ հղում կատարելով Սենատի մամուլի ծառայությանը։

«Սենատը հավանության է արժանացրել 709 թվակիր բանաձևը՝ դատապարտելով Կերչի նեղուցում Ռուսաստանի սադրանքներն ուկրաինական ռազմածովային ուժերի նկատմամբ», - ասվում է Սենատի մամուլի ծառայության հայտարարության մեջ։

Բանաձևի հեղինակներից մեկը՝ Վիսկոնսին նահանգից հանրապետական սենատոր Ռոն Ջոնսոնը նշել է, որ փաստաթղթում Մոսկվային կոչ է արվում անհապաղ բաց թողնել կալանված նավերը և ձերբակալվածներին։

Նրա խոսքով՝ բանաձևը հեղինակել է շուրջ 50 սենատոր։ Բոլորը միաձայն իրենց աջակցությունն են հայտնել Կիևին։

Հիշեցնենք, որ նոյեմբերի 25-ին ուկրաինական երեք ռազմանավեր մտել էին Կերչի նեղուց, որտեղ ռուս սահմանապահները կալանել էին դրանք և կրակ բացել նավերի ուղղությամբ, ինչի հետևանքով վիրավորվել էր ուկրաինացի 3 զինծառայող։ Հարուցվել է քրեական գործ Ռուսաստանի պետական սահմանները խախտելու հատկանիշներով։