Սիրիական բանակը երկրի հարավում ոչնչացրել է Իսլամական պետության ավելի քան 270 ահաբեկչի

Սիրիական բանակը երկրի հարավային Աս Սուվայդա նահանգում ոչնչացրել է Իսլամական պետության ավելի քան 270 ահաբեկչի։ Այս մասին հայտարարել է Սիրիայում ռուսական զինված ուժերի հրամանատարության ներկայացուցիչ Օլեգ Մակարևիչը․ գրում է Ռիա Նովոստի-ն։

Մակարևիչի խոսքով՝ հարձակողական գործողությունը կատարվել է տեղանքի համար եղանակային չափազանց բարդ պայմաններում։

«Քարանձավային այդ տեղանքում հակառակորդը կազմակերպել էր խորը, մի քանի շերտով պաշտպանություն, որը հագեցած էր հակատանկային նռնականետերով, դիպուկահարներով և ականապատ դաշտերով։ Պաշտպանության բոլոր սահմաններում հակառակորդն ուներ զինամթերքի և սննդամթերքի պահեստներ», - նշել է Սիրիայում ՌԴ զինված ուժերի հրամանատարության ներկայացուցիչը։

Մակարևիչի խոսքով՝ գործողությունն ավելի էր դժվարանում, քանի որ տանկերը և ծանր տեխնիկան չէր կարողանում ազատորեն տեղաշարժվել այդ տեղանքում, իսկ հակառակորդը զինված էր մեծ քանակությամբ հակատանկային նռնականետերով։

Սիրիական բանակին, այնուամենայնիվ, հաջողվել է բռնագրավել մեծ քանակությամբ զենքեր, այդ թվում՝ ամերիկյան հակատանկային կառավարվող 12 միավոր TOW հրթիռ։

Ռուս զինվորականի խոսքով՝ Աս Սուվայդայում գտնվող ահաբեկիչների մեծ մասն այստեղ էին եկել ԱՄՆ-ի գլխավորած միջազգային կոալիցիայի վերահսկողության տակ գտնվող տարածքներից։