Իսրայելական բանակը գործողություն է սկսել Լիբանանի հետ սահմանին

Իսրայելի պաշտպանության բանակը սկսել է «Հյուսիսային վահան» գործողությունը, որի նպատակն է գտնել և ոչնչացնել Լիբանանում գործող շիայական «Հեզբոլլահ» խմբավորման փորած այն թունելը, որը գալիս է մինչև հրեական պետության տարածք։ Այս մասին լրագրողների հետ ճեպազրույցի ժամանակ հայտարարել է Իսրայելի զինված ուժերի պաշտոնական ներկայացուցիչ Ջոնաթան Կոնրիկուսը։

«Մենք հայտարարել ենք «Հյուսիսային վահան» գործողության մեկնարկի մասին, որի նպատակն է գտնել և ոչնչացնել դեպի Իսրայելի տարածք եկող այն թունելները, որոնք փորում են «Հեզբոլլահ» շարժման անդամները։ Մենք պահեստազորային մոբիլիզացիա չենք հայտարարել, սակայն մեր ուժերը կենտրոնացրել ենք հյուսիսում։ Մեր հյուսիսային հրամանատարությունը բերվել է մարտական բարձր պատրաստվածության և պատրաստ է յուրաքանչյուր իրավիճակի և սցենարների», - նշել է իսրայելական բանակի ներկայացուցիչը։

«Չնայած՝ թունելները հատում են Իսրայելի սահմանը, դրանք դեռ պատրաստ չեն օգտագործման և ուղղակի վտանգ չեն ներկայացնում Իսրայելի քաղաքացիների համար։ Մենք այժմ գիտենք մի քանի թունելի մասին, սակայն ես հիմա չեմ նշի դրանց կոնկրետ թիվը։ Այս գործողության նպատակն է դրանք բացահայտելը և ոչնչացնելը», - շարունակել է Կոնրիկուսը։

Նա նշել է, որ գործողությունը կատարվելու է Իսրայելի տարածքում և Գոլանի բարձունքի մի մասում։

Հիշեցնենք, որ դեկտեմբերի 3-ին Իսրայելի վարչապետ Բենիամին Նեթանյահուն Բրյուսելում հանդիպում էր ունեցել ԱՄՆ պետքարտուղար Մայք Պոմպեոյի հետ։ Հանդիպման ընթացքում քննարկվել էր «Իրանի ագրեսիան ճնշելու, ինչպես նաև վերջինիս դաշնակիցներին, այդ թվում՝ Լիբանանը, Սիրիան և Իրաքը զսպելու հարցը»։