Կրեմլը մեկնաբանել է «Ռուսաստանի հետ պատերազմի» մասին Պորոշենկոյի հայտարարությունը
Մոսկվան համաձայն չէ Կերչի նեղուցում տեղի ունեցած միջադեպի վերաբերյալ Ուկրաինայի նախագահ Պետրո Պորոշենկոյի գնահատականների հետ։ Այս մասին հայտարարել է Կրեմլի մամուլի խոսնակ Դմիտրի Պեսկովը։
«Խոսքը ուկրաինական կողմի սադրանքի և Ռուսաստանի Դաշնության պետական սահմանների կոպիտ խախտման մասին է, որն իրենից ենթադրում է իրավական հետևանքներ», - ասել է Պեսկովը՝ նշելով, որ սա բացատրվում է Ուկրաինայի առաջիկա նախագահական ընտրություններով։
«Անզեն աչքով կարելի է տեսնել նախընտրական քարոզարշավի ընթացքում, որ Ռուսաստանը որպես թշնամի ներկայացնելով փորձում են ներքաղաքական խնդիրներ լուծել», - նշել է Կրեմլի մամուլի խոսնակը։
Ավելի վաղ Պորոշենկոն Fox News-ին տված հարցազրույցի ժամանակ, խոսելով Կերչի նեղուցում տեղի ունեցած միջադեպի շուրջ, հայտարարել էր Ռուսաստանի հետ պատերազմի մեկնարկի մասին։
Հիշեցնենք, որ նոյեմբերի 25-ին ուկրաինական երեք ռազմանավեր մտել էին Կերչի նեղուց, որտեղ ռուս սահմանապահները կալանել էին դրանք և կրակ բացել նավերի ուղղությամբ, ինչի հետևանքով վիրավորվել էր ուկրաինացի 3 զինծառայող։ Հարուցվել է քրեական գործ Ռուսաստանի պետական սահմանները խախտելու հատկանիշներով։
Գործով ձերբակալվել է Ուկրաինայի 24 քաղաքացի, որոնք կարող են դատապարտվել մինչև 6 տարվա ազատազրկման։
Ուկրաինան և Արևմուտքի երկրներն այս միջադեպը փորձում են օգտագործել որպես Մոսկվայի նկատմամբ նոր պատժամիջոցներ սահմանելու պատրվակ։