ԱՄՆ-ը որոշել է Թուրքիային մատակարարել Patriot տեսակի հրթիռներ՝ ընդհանուր 3,5 միլիարդ դոլար արժեքով

Ամերիկյան վարչակազմը որոշում է ընդունել Թուրքիային Patriot տեսակի զենիթահրթիռային համակարգեր մատակարարելու վերաբերյալ, որի ընդհանուր արժեքը կկազմի 3,5 միլիարդ դոլար։

Այս մասին տեղեկացնում է ԱՄՆ պաշտպանության նախարարության պաշտպանական համագործակցության և անվտանգության վարչությունը, որը պատասխանատու է ռազմական տեխնիկայի և զինամթերքի՝ այլ երկրներ մատակարարման, ինչպես նաև Վաշինգտոնի դաշնակիցներին պաշտպանության ոլորտում ֆինանսական աջակցության համար։

Որոշվել է Թուրքիա մատակարարել Patriot MIM-104E տեսակի 80 զենիթային կառավարվող հրթիռ և PAC-3 տեսակի 60 հրթիռ։

Ամրիկյան պաշտպանական գերատեսչության տեսանկյունից՝ պայմանագրի կնքումը բխում է «ԱՄՆ-ի անվտանգության և ազգային շահերից»։ Ըստ ամերիկյան կողմի՝ այն կբարձրացնի նաև «ՆԱՏՕ-ի առանցքային դաշնակցի անվտանգության մակարդակը, որը կռվում է ահաբեկչության դեմ»։

Ամերիկյան վարչակազմն արդեն այս որոշումն ուղարկել է Կոնգրեսի հաստատմանը։ Այժմ օրենսդիր մարմինն ունի 30 օր այն քննարկելու և անհրաժեշտության դեպքում արգելափակելու համար։

Ավելի վաղ Թուրքիայի նախագահ Ռեջեփ Թայիփ Էրդողանը և վերջինիս մամուլի խոսնակ Իբրահիմ Քալընը հայտարարել էին, որ Անկարան պատրաստ է գնել ամերիկյան Patriot տեսակի համակարգեր, եթե ամերիկյան կողմից ստացվի լավ առաջարկ։