Իրանի նախագահն աշխատանքային այցով մեկնել է Թուրքիա
Այսօր՝ դեկտեմբերի 20-ին, Իրանի նախագահ Հասան Ռոհանին աշխատանքային այցով կմեկնի Թուրքիա։ Ինչպես հայտնել է Իրանի նախագահի գրասենյակի՝ հասարակայնության հետ կապերի վարչության ղեկավարը, Էրդողանի և Ռոհանիի մասնակցությամբ տեղի է ունենալու երկու երկրների միջև բարձր մակարդակի համագործակցության խորհրդի 5-րդ նիստը։
Նախորդ երկկողմ ամբողջական բանակցությունները տեղի են ունեցել 2017 թ․ հոկտեմբերին։ Այս հանդիպումների արդյունքում պայմանավորվածություն էր ձեռք բերվել, որ Թուրքիան ավելի շատ նաֆթ և գազ կգնի Իրանից։ Քննարկվել էր նաև պաշտպանական ոլորտում հարաբերությունների զարգացման հնարավորությունները։
Ակնկալվում է, որ առաջիկա հանդիպման հիմնական թեման լինելու է երկկողմ տնտեսական հարաբերությունները և Վաշինտոնի՝ Իրանի նկատմամբ պատժամիջոցները վերականգնելու որոշումը։ Ավելի վաղ Թուրքիայի նախագահ Ռեջեփ Թայիփ Էրդողանը և ԱԳ նախարար Մևլութ Չավուշօղլուն բազմիցս ակնարկել են, որ ոչ մի պարագայում չեն աջակցելու Իրանի նկատմամաբ ամերիկյան պատժամիջոցներին։
Անկարա ժամանելուց առաջ Ռոհանին հայտարարել էր, որ ԱՄՆ-ի թելադրանքի ժամանակաշրջանն ավարտվել է, և Վաշինգտոնն այլևս չի կարող իր քաղաքականությունը թելադրել Մերձավոր Արևելքում։
Ռոհանին նշել էր նաև, որ Թուրքիան համարում է տարածաշրջանի «ամենաազդեցիկ խաղացողներից մեկը»։ Նա ընդգծել էր, որ ցանկանում է Անկարայի հետ առևտրաշրջանառությունը հասցնել 30 միլիարդ դոլարի։