Էրդողանը խոստացել է ոչնչացնել Սիրիայում Իսլամական պետության մնացորդները․ Թրամփ

Թուրքիայի նախագահ Ռեջեփ Թայիփ Էրդողանն ԱՄՆ նախագահ Դոնալդ Թրամփին խոստացել է ոչնչացնել այն ամենը, ինչը կարող էր Սիրիայում մնալ Իսլամական պետությունից։

Այս մասին Թրամփը գրել է իր թվիթերյան էջում։

«Թուրքիայի նախագահ Ռեջեփ Թայիփ Էրդողանը վճռականորեն տեղեկացրել է ինձ, որ արմատախիլ կանի այն ամենը, ինչը կարող էր Իսլամական պետությունից մնալ Սիրիայում։ Նա մարդ է, որը կարող է անել դա, իսկ Թուրքիան գտնվում է հարևանությամբ։ Մեր զինծառայողները վերադառնում են տուն», - գրել է ԱՄՆ նախագահը։

Հիշեցնենք, որ Դոնալդ Թրամփը դեկտեմբերի 19-ին հայտարարել էր Սիրիայում ամերիկյան զորքերի դուրսբերման մասին։ Նա այս որոշումը բացատրել էր նրանով, որ այս երկրում ավարտվել է Իսլամական պետության դեմ պայքարը։

Ամերիկացի պաշտոնատար անձանց կարծիքով՝ ավելի քան երկու հազար հոգանոց զորախմբի դուրսբերումը կարող է տևել 60-ից մինչև 100 օր։