Էրդողանը մտադիր է մոտ օրերս մեկնել Մոսկվա՝ Պուտինի հետ քննարկելու Սիրիայում ստեղծված իրավիճակը

Թուրքիայի նախագահ Ռեջեփ Թայիփ Էրդողանը հայտարարել է, որ պատրաստվում է մոտ օրերս այցելել Մոսկվա և հանդիպել ՌԴ նախագահ Վլադիմիր Պուտինի հետ՝ քննարկելու Սիրիայում տիրող իրավիճակը։

Այս մասին, ինչպես գրում է ՏԱՍՍ-ը, Էրդողանն ասել է լրագրողների հետ ճեպազրույցի ժամանակ։

«Այսօր, վաղը իմ գործընկերները կմեկնեն Մոսկվա՝ քննարկելու Սիրիայում տեղի ունեցող իրադարձությունները։ Անմիջապես դրանից հետո, կարծում եմ, այնտեղ ես հանդիպում կունենամ Վլադիմիր Պուտինի հետ», - ասել է էրդողանը։

Հատկանշական է, որ Կրեմլի մամուլի խոսնակ Դմիտրի Պեսկովը հայտարարել է, որ Էրդողանի և Պուտինի հանդիպման մասին դեռ որևէ պայմանավորվածություն չկա։

Ավելի վաղ Ռուսաստան մեկնելու մասին հայտարարել էր նաև Թուրքիայի արտաքին գործերի նախարար Մևլութ Չավուշօղլուն։ Նա նույնպես պատրաստվում է Մոսկվայում քննարկել Սիրիայից ամերիկյան զորքերի դուրսբերման հարցը։

Հիշեցնենք, որ դեկտեմբերի 19-ին էլ Թրամփը հայտարարել էր Սիրիայում Իսլամական պետության դեմ վերջնական հաղթանակի և ամերիկյան զորքերն արաբարական այս երկրից դուրս բերելու մասին։

Ավելի ուշ Սպիտակ տան մամուլի խոսնակ Սառա Սանդերսը հայտարարել է, որ ԱՄՆ-ն արդեն սկսել է զորքերի դուրսբերումը Սիրիայի տարածքից, սակայն սա և ԻՊ-ի դեմ հաղթանակը չի նշանակում, որ միջազգային կոալիցիան դադարելու է գոյություն ունենալ։

Ամերիկացի պաշտոնյաների տվյալներով՝ պետքարտուղարության աշխատակիցները 24 ժամվա մեջ դուրս են բերվել Սիրիայից, իսկ զորախմբի դուրսբերումը տեղի կունենա 60-ից 100 օրվա ընթացքում։