Անհայտ անձինք զինված հարձակում են գործել Լիբիայի արտգործնախարարության շենքի վրա

Այսօր՝ դեկտեմբերի 25-ին, անհայտ անձինք զինված հարձակում են գործել Տրիպոլիում Լիբիայի արտաքին գործերի նախարարության շենքի վրա։ Այս մասին հայտնում է Al Arabiya հեռուստաալիքը։

Նշվում է, որ հարձակումը կատարել է մահապարտ-ահաբեկիչը։ Հարձակման հետևանքով զոհվել է մեկ մարդ, վիրավորվել՝ ևս հինգը։

Libya Akhbar լրատվականի փոխանցմամբ՝ զինյալները եղել են 6-ը, որոնցից 3-ը՝ մահապարտներ։ Afrigate News-ի փոխանցմամբ՝ զոհվել է ԱԳՆ-ի իսլամական համագործակցության բաժնի ղեկավարը։

Նշվում է, որ շենքի ներսում տեղի ունեցած պայթյունից հետո անմիջապես գործարկվել է մուտքի մոտ տեղադրված պայթուցիկը։ Պայթյուներից հետո կրակոցներ են հնչել։ Արտաքին գործերի նախարարության շենք են ուղարկվել հատուկ ծառայության աշխատակիցներ, որոնք կարողացել են ոչնչացնել մեկ զինյալի, որի վրա նույնպես ամրակցված է եղել պայթուցիկ սարք։

Թաղամասը, որտեղ գտնվում է ԱԳՆ շենքը, ամբողջությամբ շրջափակված է։ Շենքի վերևի հարկերից մեկում հրդեհ է բռնկվել, որն սկսել է տարածվել շենքի մյուս մասեր։