Ռուս գիտնականները հայտնաբերել են արյան քաղցկեղի հայտնաբերման նոր՝ ավելի մատչելի մեթոդ

Սիբիրի դաշնային համալսարանի գիտնականները մշակել են արյան քաղցկեղի տեսակներից մեկի հետ կապված գենոտիպի փոփոխության հայտնաբերման և նույնականացման նոր ալգորիթմ, որը յոթ անգամ էժան է դասական մեթոդից և թույլ է տալիս ախտորոշել օնկոլոգիական այս հիվանդությունը դրա վաղ շրջանում՝ 1-2 օրվա ընթացքում։

Այս մասին գրում է ՏԱՍՍ-ը՝ հղում կատարելով ՌԴ գիտության և բարձրագույն կրթության նախարարության մամուլի ծառայության տարածած հաղորդագրությանը։

«Սիբիրի դաշնային համալսարանի գիտնականները մշակել են արյան քաղցկեղի տեսակներից մեկի հայտնաբերման նոր ալգորիթմ։ Սրա առավելությունն իր մատչելիությունն է և այն, որ հիվանդությունը կարելի է բացահայտել վաղ շրջանում, երբ դեռ հիվանդությունը տարածվել է օրգանիզմի բջիջների ընդամենը 3-5%-ի վրա», - ասվում է տարածված հաղորդագրության մեջ։

Հիվանդության ախտորոշումն արագացնելու համար գիտնականները մշակել են ալգորիթմ, որը բաղկացած է երկու փուլից։ Առաջին փուլը, որը տևում է ոչ ավել քան մեկ օր, թույլ է տալիս միանշանակ բացահայտել գենոտիպի փոփոխության առկայությունը, այսինքն՝ պարզել թե ովքեր են առողջ, ովքեր՝ ոչ։

Երկրորդ փուլը, որը նույնպես տևում է ոչ ավել քան մեկ օր, հաստատում է ավելի վաղ բացահայտված գենոտիպի փոփոխության առկայությունը և արձանագրում է այն։

Սիբիրի դաշնային համալսարանի մոլեկուլիար-գենետիկ մեթոդով զննությունների լաբորատորիայի ղեկավար Տատյանա Սուբոտինայի խոսքով՝ ախտորոշման և բուժման այս նոր մեթոդը թույլ է տալիս զննել միաժամանակ 30 մարդու։