Սիրիայում միջազգային կոալիցիայի ավիահարվածի հետևանքով զոհվել է 11 մարդ
Ավելի քան 11 մարդ է զոհվել սիրիական Դեր Զոր նահանգի Էլ Շաաֆա բնակավայրում ԱՄՆ-ի գլխավորած միջազգային կոալիցիայի ավիահարվածի հետևանքով։ Այս մասին գրում է ՏԱՍՍ-ը՝ հղում կատարելով սիրիական ՍԱՆԱ գործակալությանը։
Աղբյուրի փոխանցմամբ՝ բոլոր զոհվածները մի ընտանիքի անդամներ էին։
Իսլամական պետության դեմ պայքարի միջազգային կոալիցիան ստեղծվել է ԱՄՆ-ի նախաձեռնությամբ՝ 2014 թ․ սեպտեմբերին ՆԱՏՕ-ի գագաթնաժողովի ժամանակ։
Միջազգային զորքերի խմբի շտաբի հաղորդած տվյալների համաձայն՝ 2014 թ․ ամառվանից մինչև 2018 թ․ դեկտեմբերի վերջ Սիրիայում և Իրաքում իրականացված օդային հարձակումների հետևանքով զոհվել է 1139 մարդ։
Հիշեցնենք, որ դեկտեմբերի 19-ին ԱՄՆ նախագահ Դոնալդ Թրամփը հայտարարել էր Սիրիայում Իսլամական պետության դեմ վերջնական հաղթանակի և ամերիկյան զորքերն արաբարական այս երկրից դուրս բերելու մասին։
Ավելի ուշ Սպիտակ տան մամուլի խոսնակ Սառա Սանդերսը հայտարարել է, որ ԱՄՆ-ն արդեն սկսել է զորքերի դուրսբերումը Սիրիայի տարածքից, սակայն սա և ԻՊ-ի դեմ հաղթանակը չի նշանակում, որ միջազգային կոալիցիան դադարելու է գոյություն ունենալ։
Ամերիկացի պաշտոնյաների տվյալներով՝ պետքարտուղարության աշխատակիցները 24 ժամվա մեջ դուրս են բերվել Սիրիայից, իսկ զորախմբի դուրսբերումը տեղի կունենա 60-ից 100 օրվա ընթացքում։
Ավելի ուշ The New York Times թերթը, հղում կատարելով վարչակազմի ներկայացուցիչներին, գրեց, որ Թրամփը համաձայնել է 4 ամիս հատկացնել զորքերի դուրսբերման համար։