Մանբիջում տեղի ունեցած ահաբեկչության հետևանքով զոհվել է 27 մարդ․ Էրդողան

Մանբիջում տեղի ունեցած ահաբեկչական գործողությունը, որի հետևանքով զոհվել էին ամերիկացի մի քանի զինվորականներ, հավանաբար, իրականացվել է Սիրիայից զորքերը դուրս բերելու մասին ԱՄՆ-ի որոշման վրա ազդելու նպատակով։ Այս մասին հայտարարել է Թուրքիայի նախագահ Ռեջեփ Թայիփ Էրդողանը։

«Մանբիջում տեղի ունեցած պայթյունի հետևանքով զոհվել է 27 մարդ, որոնց թվում՝ 5 ամերիկացի զինծառայող։ Բացառված չէ, որ սրա կազմակերպիչները ինչ-որ կերպ ազդեցություն ունենան Սիրիայից զորքերը դուրս բերելու մասին ԱՄՆ-ի որոշման վրա», - Խորվաթիայի նախագահ Գրաբար Կիտարովիչի հետ հանդիպումից հետո տեղի ունեցած մամուլի ասուլիսի ժամանակ հայտարարել է Էրդողանը։

Նա հիշեցրել է, որ Թրամփը բավական վճռական է տրամադրված զորքերի դուրսբերման հարցում։ Բացի այդ՝ Թուրքիայի նախագահը խոստացել է շարունակել պայքարն Իսլամական պետության դեմ։

Հիշեցնենք, որ հունվարի 16-ին հզոր պայթյուն էր որոտացել Մանբիջի ռեստորաններից մեկում, որտեղ, ըստ նախնական տվյալների, այդ պահին եղել է ամերիկացի 15 զինծառայող։