Ռուսաստանի սահմանների մոտ նկատվել են ամերիկյան հետախույզ-ինքնաթիռներ
Հունվարի 28-ին՝ ողջ օրվա ընթացքում, Ռուսաստանի սահմանների մոտ նկատվել են ամերիկյան երեք հետախույզ-ինքնաթիռներ։ Այս մասին գրում է Ria Novosti-ն՝ հղում կատարելով PlaneRadar-ին։
Աղբյուրի փոխանցմամբ՝ բրիտանական Միլդենհոլ ավիաբազայից թռիչքն սկսել է Boeing RC-135V ինքնաթիռը՝ մոտենալով Կալինինգրադի սահմաններին։ Միևնույն ժամանակ Իտալիայի Սիգոնելլա ավիաբազայից թռիչքն է սկսել RQ-4B Global Hawk ինքնաթիռը։ Վերջինս մոտեցել է Լենինգրադի և Պսկովի շրջաններին։ Իսկ Բալթիկ ծովի օդային տարածքում ռուսական ՍՈւ-27 կործանիչը կանխել է ԱՄՆ ռազմաօդային ուժերի P-8A Poseidon ինքնաթիռի թռիչքը։ Ռուսական կործանիչը անվտանգ տարածության վրա մոտեցել է ամերիկյան ինքնաթիռին և վերադարձել տեղակայման վայր այն ժամանակ, երբ P-8A-ը հեռացել է ՌԴ-ի սահմաններից։
Ria Novosti-ն գրում է, որ վերջին շրջանում ռուսական սահմանների մոտ հաճախակիացել են ամերիկյան հետախույզ-ինքնաթիռների թիռչքները։ Դրանք հիմնականում կատարվում են Ռուսաստանի արևմտյան սահմանների մոտ՝ Ղրիմի և Կրասնոդարի շրջաններում։
Նախորդ ողջ տարվա ընթացքում ռուսական ռազմաօդային ուժերի ռադիոտեխնիկական սարքերը ֆիքսել են ավելի քան 980 հազար օդային օբյեկտ, որոնցից երեք հազարը օտար ռազմական ինքնաթիռներ էին։ Նկատվել է շուրջ հազար հետախույզ-ինքնաթիռ։