Մոլդովայում քվեաթերթիկների 90%-ի հաշվարկից հետո առաջատարը սոցիալիստներն են

Մոլդովայի ընդդիմադիր «Acum» դաշինքը քվեաթերթիկների 90%-ի հաշվարկից հետո հավաքել է ձայների 25,06%-ը և դուրս է եկել երկրորդ հորիզոնական՝ առաջ անցնելով իշխող Դեմոկրատական կուսակցությունից։

Այս մասին հայտնել է Մոլդովայի կենտրոնական ընտրական հանձնաժողովը։

ԿԸՀ-ի տվյալներով՝ Դեմոկրատական կուսակցությունը հավաքել է ձայների 24,9%-ը։ Ընտրություններում առաջին տեղում է Մոլդովայի Սոցիալիստական կուսակցությունը, որը հավաքել է 31,69% ձայն։

Օրհեի քաղաքի քաղաքապետ, գործարար Իլան Շորի «Շոր» կուսակցությունը չորրորդն է՝ հավաքելով  8,64%։

Խորհրդարանական ընտրություններին մասնակցող մյուս կուսակցությունները չեն հաղթահարել նվազագույն շեմը՝ 6%-ը։

Փետրվարի 24-ին Մոլդովայում առաջին անգամ անցակցնել են խորհրդարանական՝ փոփոխված համակարգով ընտրություններ։ Եթե նախկինում 101 պատգամավորներն ընտրվում էին կուսակցությունների համամասնական ցուցակներով, ապա այժմ միայն 50 պատգամավոր է ընտրվում նախկինի պես։ Մնացած 51-ն ընտրվում են մեծամասնական կարգով։