Կոլումբիացի դիվանագետները ոտքով լքել են Վենեսուելան

Կոլումբիացի երեք հյուպատոսներ ընտանիքների հետ միասին լքել են Վենեսուելան։ Այս մասին տեղեկացնում է Lenta-ն՝ հղում կատարելով Ria Novovsti-ին։

Նշվում է, որ դիվանագետները վենեսուելացի ոստիկանների ուղեկցությամբ քայլելով անցել են սահմանը։

Փետրվարի 23-ին Նիկոլաս Մադուրոն հայտարարել էր Կոլումբիայի հետ դիվանագիտական հարաբերությունները խզելու մասին և 24 ժամ ժամանակ էր տվել կոլումբիացի դիվանագետներին երկիրը լքելու համար։ Այսպիսով՝ Վենեսուելայում գտնվող Կոլումբիայի շուրջ 5 միլիոն քաղաքացիներ մնացել են առանց դիվանագիտական աջակցության։

Բացի դիվանագիտական հարաբերությունները խզելուց, Մադուրոն հրահանգել է նաև զորքեր տեղակայել Կոլումբիայի հետ սահմանին, որպեսզի «ապահովվի մարդկանց անվտանգությունը և խաղաղությունը»։

Փետրվարի 20-ին Վենեսուելան անորոշ ժամանակով փակել է Կարիբյան ծովի՝ Նիդերլանդներին պատկանող կղզիների հետ ծովային սահմանը։ Այս որոշումն էլ կայացվել էր ընդդիմության՝ ԱՄՆ-ից ուղարկված հումանիտար օգնությունը ծովային ճանապարհով երկիր մտցնելու ձգտումների հետ։

Ավելի վաղ հայտնի էր դարձել, որ Ռուսաստանը դեղորայք էր ուղարկել Վենեսուելա։ Իսկ փետրվարի 10-ին էլ Կոլումբիա էր հասել ամերիկյան առաջին ինքնաթիռը՝ լի սննդամթերքով և դեղորայքով։ Նախագահ Նիկոլաս Մադուրոն հայտարարել էր, որ ուղեբեռը թունավորված է, և արգելափակել էր դրա մուտքը երկիր։

Հիշեցնենք, որ Հունվարի 23-ից Վենեսուելայում տեղի են ունենում զանգվածային հակակառավարական ցույցեր, որոնք կազմակերպում էր ընդդիմությունը։ Մի շարք վայրերում դրանք վերաճել են բախումների իրավապահների հետ, ինչի արդյունքում զոհեր են գրանցվել։ Pitazo թերթի տվյալներով՝ բախումների հետևանքով զոհվել է ավելի քան երկու տասնյակ մարդ։

Կարակասում տեղի ունեցած հանրահավաքի ժամանակ ընդդիմության առաջնորդ, ազգային ժողովի նախագահ Խուան Գուայդոն իրեն հռչակել է Վենեսուելայի նախագահի պաշտոնակատար։ Նրան երկրի ժամանակավոր ղեկավար են ճանաչել տարածաշրջանի մի շարք պետություններ, որոնց թվում են ԱՄՆ-ը, Կանադան, Արգենտինան, Բրազիլիան, Կոլումբիան, Պարագվայը, Պերուն, Չիլին և Էկվադորը։

Նիկոլաս Մադուրոն տեղի ունեցածը համարում է պետական հեղաշրջում, որը կազմակերպել է Վաշինգտոնը։ Նա հայտարարել է ԱՄՆ-ի հետ դիվանագիտական հարաբերությունները խզելու և ամերիկացի դիվանագետներին արտաքսելու մասին։ Իր հերթին, ամերիկյան կողմը հայտարարել է, որ Մադուրոն չի կարող նման պահանջ ներկայացնել, քանի որ այդ իրավասությունը չունի, և «փաստացի երկրի ղեկավար չէ»։