Պակիստանի ռազմաօդային ուժերը խոցել են հնդկական երկու ինքնաթիռ

Պակիստանի ռազմաօդային ուժերը խոցել են Հնդկաստանի օդուժի երկու կործանիչ, որոնք, ըստ Իսլամաբադի պնդումների, խախտել էին երկրի օդային սահմանը։ Այս մասին հայտարարել է Պակիստանի զինված ուժերի մամուլի քարտուղար Ասիֆ Գաֆուրը։ Նրա խոսքով՝ հնդկական ինքնաթիռներից մեկի օդաչուն գերի է վերցվել։

«Ի պատասխան Պակիստանի այսօր առավոտյան արած քայլերի, որի մասին ավելի վաղ հաղորդել էր ԱԳՆ-ը, Հնդկաստանի ռազմաօդային ուժերի երկու կործանիչներ հատել են մեր օդային սահմանը։ Ինքնաթիռներից մեկն ընկել է Ջամու և Քաշմիր նահանգի պակիստանյան տարածք, իսկ երկրորդը՝ Քաշմիրի՝ հնդկական մաս։ Հնդիկ օդաչուներից մեկը գերի է վերցվել», - հաղորդել է մամուլի խոսնակը։

Ավելի վաղ Պակիստանի արտաքին գործերի նախարարությունը հաղորդել էր, որ պակիստանյան օդուժի ինքնաթիռները ստուգողական թռիչք են իրականացրել սահմանային շրջաններում և ցուցադրական մի քանի հրթիռ են արձակել բնակավայրերից հեռու ոչ զինվորական թիրախների ուղղությամբ։

«Միակ նպատակն այն էր, որ ցույց տանք, որ մենք ունակ ենք ինքնապաշտպանվել», - հայտարարել էին Պակիստանի արտաքին գործերի նախարարությունից։

Հիշեցնենք, որ ավելի վաղ Հնդկաստանի ռազմաօդային ուժերի «Միրաժ 2000» տեսակի 20 ինքնաթիռներ Քաշմիր նահանգի՝ Պակիստանի վերահսկողության տակ գտնվող տարածքում հարվածներ էին հասցրել «Ջեյշ է Մոհամմադ» խմբավորման հենակետերին։

Ջամմու և Քաշմիր նահանգը Հնդկաստանի միակ նահանգն է, որտեղ բնակչության մեծ մասը մուսուլմաններ են։ Այստեղ իրավիճակը լարված է բավական երկար ժամանակ։ Այն կռվան է երկու պետությունների միջև դեռ 1947 թվականից, երբ Բրիտանական Հնդկաստանը, ստանալով անկախություն, կրոնական հիմքով բաժանվեց երկու մասի։ Ներկայում Քաշմիրում չկա հստակ սահման։ Այն բաժանված է «վերահսկողության գծով»։

Նահանգի հնդկական մասում ակտիվորեն գործում են խմբավորումներ, որոնք կողմ են Հնդկաստանից անկախանալուն։ Դելին մշտապես մեղադրում է Իսլամաբադին ահաբեկիչների աջակցելու մեջ։