Վենեսուելայի կենտրոնական բանկից դուրս է բերվել 8 տոննա ոսկի․ Reuters

Վենեսուելայի կենտրոնական բանկի պահոցներից դուրս է բերվել ավելի քան 8 տոննա ոսկի։ Այս մասին հայտնում է Reuters գործակալությունը՝ հղում կատարելով Բոլիվարյան Հանրապետության կառավարական աղբյուրներին։

Նշվում է, որ ոսկին դուրս է բերվել նախորդ շաբաթ կառավարական հատուկ տրանսպորտային միջոցներով։ Ինչպես հայտնում է աղբյուրը, գործողությունը կատարվել է այն ժամանակ, երբ կենտրոնական բանկի նախագահ Կալիկստո Օրտեգան եղել է արտասահմանում։ Առայժմ դեռ հայտնի չէ, թե որտեղ է ոսկին։

«Նրանք պատրաստվում են ապօրինի կերպով ոսկին վաճառել արտասահմանում», - հայտարարել է Վենեսուելայի խորհրդարանի ընդդիմադիր պատգամավոր Անխել Ալվարադոն։

Հատկանշական է, որ կենտրոնական բանկից դեռ որևէ պաշտոնական մեկնաբանություն չի հնչել տարածված այս տեղեկության վերաբերյալ։

Հունվարի 31-ին հաղորդվում էր, որ Վենեսուելայի կենտրոնական բանկը պատրաստվում է իր պահոցներից 15 տոննա ոսկի տանել Արաբական Միացյալ Էմիրություններ վաճառելու, որպեսզի այդպիսով կարողանա լրացնել արտարժույթի պահուստները։

Հունվարի 29-ին Վենեսուելայի խորհրդարանը հայտարարություն էր տարածել, ըստ որի՝ Մոսկվայից Կարակաս է ժամանել մի ինքնաթիռ, որով պետք է երկրից դուրս տարվի 20 տոննա ոսկի։ Ավելի ուշ Կրեմլի մամուլի խոսնակ Դմիտրի Պեսկովը հերքել էր այս տեղեկությունները։