Պակիստանը պատրաստվում է ազատ արձակել գերեվարված հնդիկ օդաչուներից մեկին

Պակիստանի վարչապետ Իմրան Խանը խորհրդարանում ունեցած ելույթի ժամանակ հայտարարել է, որ գերեվարված հնդիկ օդաչուներից մեկը կուղարկվի հայրենիք։ Այս մասին գրում է Ռիա Նովոստի-ն։

«Մենք, որպես բարի կամքի դրսևորում, որոշել ենք ազատ արձակել հնդիկ օդաչուներից մեկին», - ասել է Խանը՝ հավելելով, որ ինքը փորձել է ստեղծված իրավիճակը քննարկել Հնդկաստանի վարչապետ Նարենդրա Մոդիի հետ։

Պակիստանի վարչապետի խոսքով՝ եթե Հնդկաստանը փորձի ագրեսիվ գործողություններ ձեռնարկել, ապա իրենք ստիպված կլինեն պատասխանել։

Նա հույս է հայտնել, որ միջազգային հանրությունը թույլ չի տա, որ իրավիճակն էլ ավելի սրվի։

Հիշեցնենք, որ փետրվարի 26-ին Հնդկաստանը հայտարարել էր «Ջեյշ է Մոհամմադ» խմբավորման ճամբարին ավիահարված հասցնելու մասին, որը գտնվում է Քաշմիր նահանգնի՝ Պակիստանի վերահսկողության տակ գտնվող տարածքում։

Արդեն այսօր՝ փետրվարի 27-ին, Պակիստանի ռազմաօդային ուժերը հայտարարեցին, որ օդային հարվածներ են հասցրել Ջամու և Քաշմիր նահանգի՝ Հնդկաստանի տիրապետության տակ գտնվող տարածքներին։

Դելին և Իսլամաբադը նաև հայտարարեցին, որ խոցել են միմյանց կործանիչներ։

Ջամմու և Քաշմիր նահանգը Հնդկաստանի միակ նահանգն է, որտեղ բնակչության մեծ մասը մուսուլմաններ են։ Այստեղ իրավիճակը լարված է բավական երկար ժամանակ։ Այն կռվան է երկու պետությունների միջև դեռ 1947 թվականից, երբ Բրիտանական Հնդկաստանը, ստանալով անկախություն, կրոնական հիմքով բաժանվեց երկու մասի։ Ներկայում Քաշմիրում չկա հստակ սահման։ Այն բաժանված է «վերահսկողության գծով»։

Նահանգի հնդկական մասում ակտիվորեն գործում են խմբավորումներ, որոնք կողմ են Հնդկաստանից անկախանալուն։ Դելին մշտապես մեղադրում է Իսլամաբադին ահաբեկիչների աջակցելու մեջ։