Իսլամաբադը պատրաստ է Մոսկվայի միջնորդությամբ բանակցություններ սկսել Դելիի հետ
Իսլամաբադը պատրաստ է Մոսկվայի միջնորդությամբ բանակցություններ սկսել Դելիի հետ։ Այս մասին հայտարարել է Պակիստանի արտաքին գործերի նախարար Շահ Մեհմուդ Կուրեշին։
«Սերգեյ Լավրովն առաջարկել է միջնորդել։ Չգիտեմ Հնդկաստանի վերաբերյալ ինչպես, բայց ցանկանում եմ Ռուսաստանին ասել, որ Պակիստանը պատրաստ է նստել բանակցությունների սեղանի շուրջ և թուլացնել լարվածությունը», - ասել է նախարարը։
Ավելի վաղ ՌԴ ԱԳ նախարար Սերգեյ Լավրովը հայտարարել էր, որ մոսկվան պատրաստ է բանակցությունների հարթակ տարամդրել, եթե կողմերը դեմ չեն։
Հիշեցնենք, որ փետրվարի 26-ին Հնդկաստանը հայտարարել էր «Ջեյշ է Մոհամմադ» խմբավորման ճամբարին ավիահարված հասցնելու մասին, որը գտնվում է Քաշմիր նահանգնի՝ Պակիստանի վերահսկողության տակ գտնվող տարածքում։
Արդեն այսօր՝ փետրվարի 27-ին, Պակիստանի ռազմաօդային ուժերը հայտարարեցին, որ օդային հարվածներ են հասցրել Ջամու և Քաշմիր նահանգի՝ Հնդկաստանի տիրապետության տակ գտնվող տարածքներին։
Դելին և Իսլամաբադը նաև հայտարարեցին, որ խոցել են միմյանց կործանիչներ։
Հատկանշական է, որ Պակիստանը և Հնդկաստանը միջուկային ակումբի անդամ են, և միջազգային հանրությունն անհանգստացած է այստեղ կայունության խաթարմամբ՝ կողմերին կոչ անելով զսպվածության դրսևորել։
Ջամմու և Քաշմիր նահանգը Հնդկաստանի միակ նահանգն է, որտեղ բնակչության մեծ մասը մուսուլմաններ են։ Այստեղ իրավիճակը լարված է բավական երկար ժամանակ։ Այն կռվան է երկու պետությունների միջև դեռ 1947 թվականից, երբ Բրիտանական Հնդկաստանը, ստանալով անկախություն, կրոնական հիմքով բաժանվեց երկու մասի։ Ներկայում Քաշմիրում չկա հստակ սահման։ Այն բաժանված է «վերահսկողության գծով»։
Նահանգի հնդկական մասում ակտիվորեն գործում են խմբավորումներ, որոնք կողմ են Հնդկաստանից անկախանալուն։ Դելին մշտապես մեղադրում է Իսլամաբադին ահաբեկիչների աջակցելու մեջ։