Հնդկաստանի հետ միջուկային պատերազմը կարող է հանգեցնել երկու երկրների կործանմանը․ Պակիստանի ԱԳ նախարար

Պակիստանի և Հնդկաստանի միջև պատերազմը կարող է հանգեցնել երկու երկրների ոչնչացմանը։ Այս մասին CNN-ին տված հարցազրույցի ժամանակ հայտարարել է Պակիստանի արտաքին գործերի նախարար Շահ Մեհմուդ Կուրեշին։

«Պակիստանը երբեք չի ցանկացել լարվածության աճ և չի ցանկանում լինել ագրեսոր։ Միջուկային զենքի կիրառումը կարող է կործանարար լինել երկու պետությունների համար», - ասել է Կուրեշին։

«Մենք ունենք նոր կառավարություն՝ նոր մոտեցումներով։ Մենք ցանկանում ենք ապրել խաղաղ։ Ներկայիս կառավարության քաղաքականությունը հետևյալն է․ թույլ չտալ, որ մեր պետության տարածքն ինչ-որ կազմակերպությունների կամ մարդկանց կողմից օգտագործվի ինչ-որ մեկի, այդ թվում՝ Հնդկաստանի նկատմամբ ահաբեկչական գործողություններ կատարելու նպատակով», - հավելել է Պակիստանի արտաքին քաղաքական գերատեսչության ղեկավարը։

Հիշեցնենք, որ ավելի վաղ Կուրեշին հայտարարել էր, որ Իսլամաբադը պատրաստ է ընդունել Մոսկվայի առաջարկը և նստել բանակցությունների սեղանի շուրջ։ Մինչ այդ ՌԴ ԱԳ նախարար Սերգեյ Լավրովը հայտարարել էր, որ Մոսկվան պատրաստ է բանակցությունների հարթակ տրամադրել, եթե կողմերը դեմ չեն։

Փետրվարի 26-ին Հնդկաստանը հայտարարել էր «Ջեյշ է Մոհամմադ» խմբավորման ճամբարին ավիահարված հասցնելու մասին, որը գտնվում է Քաշմիր նահանգնի՝ Պակիստանի վերահսկողության տակ գտնվող տարածքում։

Արդեն այսօր՝ փետրվարի 27-ին, Պակիստանի ռազմաօդային ուժերը հայտարարեցին, որ օդային հարվածներ են հասցրել Ջամու և Քաշմիր նահանգի՝ Հնդկաստանի տիրապետության տակ գտնվող տարածքներին։

Դելին և Իսլամաբադը նաև հայտարարեցին, որ խոցել են միմյանց կործանիչներ։

Հատկանշական է, որ Պակիստանը և Հնդկաստանը միջուկային ակումբի անդամ են, և միջազգային հանրությունն անհանգստացած է այստեղ կայունության խաթարմամբ՝ կողմերին կոչ անելով զսպվածության դրսևորել։

Ջամմու և Քաշմիր նահանգը Հնդկաստանի միակ նահանգն է, որտեղ բնակչության մեծ մասը մուսուլմաններ են։ Այստեղ իրավիճակը լարված է բավական երկար ժամանակ։ Այն կռվան է երկու պետությունների միջև դեռ 1947 թվականից, երբ Բրիտանական Հնդկաստանը, ստանալով անկախություն, կրոնական հիմքով բաժանվեց երկու մասի։ Ներկայում Քաշմիրում չկա հստակ սահման։ Այն բաժանված է «վերահսկողության գծով»։

Նահանգի հնդկական մասում ակտիվորեն գործում են խմբավորումներ, որոնք կողմ են Հնդկաստանից անկախանալուն։ Դելին մշտապես մեղադրում է Իսլամաբադին ահաբեկիչների աջակցելու մեջ։