ԱՄՆ-ում նշել են սպառազինությունների վերահսկման շուրջ Ռուսաստանի հետ բանակցություններ սկսելու նախապայմանները

Տեղադրվել է 05/03/2019.
© REUTERS/Joshua Roberts

Միացյալ Նահանգները պատրաստ է Ռուսաստանի հետ բանակցություններ վարել սպառազինությունների վերահսկման շուրջ, սակայն որոշակի նախապայմաններով։ Այս մասին ՏԱՍՍ-ի թղթակցի հետ զրույցում ասել է ԱՄՆ պետքարտուղարության ներկայացուցիչը՝ մեկնաբանելով ՌԴ նախագահ Վլադիմիր Պուտինի հրամանագիրը Միջին և ցածր հեռահարության հրթիռների ոչնչացման մասին պայմանագրի դրույթների կատարումը դադարեցնելու վերաբերյալ։

«Միացյալ Նահանգները նախկինի պես հավատարիմ է սպառազինությունների արդյունավետ վերահսկմանը, որն օժանդակում է ԱՄՆ-ի և դաշնակիցների անվտանգության ապահովվմանը, ենթակա է պարտադիր կատարման և ներառում է գործընկերների, որոնք պատասխանատու կերպով կատարում են իրենց պարտավորությունները։ Մենք պատրաստ ենք Ռուսաստանի հետ բանակցել սպառազինությունների վերահսկման շուրջ», - ասել է պետքարտուղարության ներկայացուցիչը։

ԱՄՆ-ի արտաքին քաղաքական գերատեսչությունում նաև ափսոսանք են հայտնել այն կապակցությամբ, որ Մոսկվան «պատրաստ չէ անհրաժեշտ քայլեր ձեռնարկել Միջին և ցածր հեռահարության հրթիռների ոչնչացման մասին պայմանագրի դրույթները պահպանելու ուղղությամբ»։

Հիշեցնենք, որ փետրվարի 2-ին Միացյալ Նահանգները հայտարարել էր, որ դուրս է գալիս Միջին և ցածր հեռահարության հրթիռների ոչնչացման մասին պայմանագրից, որը կնքվել էր 1987 թ․ ԱՄՆ-ի և ԽՍՀՄ-ի միջև։ Ի պատասխան՝ Մոսկվան հայտարարեց, որ նույնպես դուրս է գալիս պայմանագրից և պատրաստվում է նոր հրթիռներ մշակել, որոնք արգելված էին փաստաթղթով։

Նույն օրը ՌԴ նախագահ Վլադիմիր Պուտինը հայտարարեց, որ Մոսկվան հայելային պատասխան կտա Վաշինգտոնի այս քայլին՝ նույնպես դադարեցնելով իր մասնակցությունը պայմանագրին։

Որոշիչ բառեր: ԱՄՆ, ԱՄՆ պետքարտուղարություն, Միջին և ցածր հեռահարության հրթիռների մասին պայմանագիր, Ռուսաստան

Վերջին հոդվածները

Տեսնել բոլոր հոդվածները

We use cookies to ensure that we give you the best experience on our website. You may delete and block all cookies from us, but certain parts of the site may not work properly.