Մահացել է ռուս հայտնի ռեժիսոր Մարլեն Խուցիևը

Կյանքի 94-րդ տարում մահացել է ռուս հայտնի կինոռեժիսոր Մարլեն Խուցիևը։ Այս մասին գրում է Ռիա Նովոստի-ն՝ հղում կատարելով ՌԴ կինեմատոգրաֆիստների միությանը։

«Առավոտյան 07։00-ի սահմաններում Մարլեն Մարտինովիչն արդեն չկար։ Նա մահացավ Բոտկինսկիի հիվանդանոցում», - հայտնել է լրատվականի զրուցակիցը։

Նշվում է, որ կինոռեժիսորը հոսպիտալացվել էր դեռ նախորդ տարվա դեկտեմբերի վերջին։ Հունվարին նրա վիճակը համեմատաբար լավացել էր։ Մարտի 16-ից Խուցիևը գտնվում էր վերակենդանացման բաժանմունքում՝ բժիշկների վերահսկողության տակ։

Մարլեն Խուցիևը ծնվել է 1925 թ․ հոկտեմբերի 4-ին Թբիլիսիում։ 1950 թ․ ավարտել  է Համամիութենական կինոինստիտուտի ռեժիսորական ֆակուլտետը։ 1959 թվականից աշխատել է «Մոսֆիլմ» ստուդիայում։

Առաջին գեղարվեստական ֆիլմն է «Գարունը Զարեչնայա փողոցում» (1956, Ֆ. Միրոների հետ)։ Խուցիևի հետագա՝ «Երկու Ֆեոդոր» (1959), «Ես քսան տարեկան եմ» (1965), «Հուլիսյան անձրև» (1967) ֆիլմերը շոշափում են հասարակական և բարոյական կարևոր հարցեր։ Արժանացել է համամիութենական և միջազգային կինոփառատոների մրցանակների։ 1965 թվականին արժանացել է ՌԽՖՍՀ արվեստի վաստակավոր գործչի կոչմանը։