Քաշմիր նահանգում կրկին իրավիճակը լարվել է․ պակիստանյան կողմի արձակած կրակոցներից զոհվել է հնդիկ զինվորական
Հնդկաստանի Քաշմիր նահանգում հնդիկ զինվորականը զոհվել է պակիստանյան կողմից արձակված կրակոցից։ Այս մասին տեղեկացնում է IANS գործակալությունը՝ հղում կատարելով Հնդկաստանի պաշտպանության նախարարությանը։
Ինչպես պնդում են աղբյուրները, պակիստանցի զինվորականներն առավոտյան սկսել են «առանց պատճառի կրակել» հրաձգային և հրետանային զինատեսակներից։
«Մեր զինվորականները վճռական պատասխան են տալիս այդ գործողություններին», - ասել է Հնդկաստանի պաշտպանության նախարարության ներկայացուցիչը։
Բացի այդ, հաղորդվում էր նաև, որ Ջամմու և Քաշմիր նահանգում այսօր առավոտյան վիրավորվել է երկու հնդիկ ոստիկան։
Հիշեցնենք, որ փետրվարի 26-ին Հնդկաստանը հայտարարել էր «Ջեյշ է Մոհամմադ» խմբավորման ճամբարին ավիահարված հասցնելու մասին, որը գտնվում է Քաշմիր նահանգնի՝ Պակիստանի վերահսկողության տակ գտնվող տարածքում։
Արդեն հաջորդ օրը՝ փետրվարի 27-ին, Պակիստանի ռազմաօդային ուժերը հայտարարեցին, որ օդային հարվածներ են հասցրել Ջամու և Քաշմիր նահանգի՝ Հնդկաստանի տիրապետության տակ գտնվող տարածքներին։
Դելին և Իսլամաբադը նաև հայտարարեցին, որ խոցել են միմյանց կործանիչներ։
Հատկանշական է, որ Պակիստանը և Հնդկաստանը միջուկային ակումբի անդամ են, և միջազգային հանրությունն անհանգստացած է այստեղ կայունության խաթարմամբ՝ կողմերին կոչ անելով զսպվածության դրսևորել։
Ջամմու և Քաշմիր նահանգը Հնդկաստանի միակ նահանգն է, որտեղ բնակչության մեծ մասը մուսուլմաններ են։ Այստեղ իրավիճակը լարված է բավական երկար ժամանակ։ Այն կռվան է երկու պետությունների միջև դեռ 1947 թվականից, երբ Բրիտանական Հնդկաստանը, ստանալով անկախություն, կրոնական հիմքով բաժանվեց երկու մասի։ Ներկայում Քաշմիրում չկա հստակ սահման։ Այն բաժանված է «վերահսկողության գծով»։
Նահանգի հնդկական մասում ակտիվորեն գործում են խմբավորումներ, որոնք կողմ են Հնդկաստանից անկախանալուն։ Դելին մշտապես մեղադրում է Իսլամաբադին ահաբեկիչների աջակցելու մեջ։