Թրամփն ԱՄՆ-ի պատմության ամենաիսրայելամետ նախագահն է․ Սպիտակ տուն

Սպիտակ տան մամուլի խոսնակ Սառա Սանդերսը հայտարարել է, որ Դոնալդ Թրամփն Իսրայելի շահերի օգտին գործում է ավելի շատ, քան ԱՄՆ-ի պատմության ընթացքում որևէ այլ նախագահ։

«Դոնալդ Թրամփը մեր երկրի պատմության ամենաիսրայելամետ նախագահն է», - իր թվիթերյան էջում գրել է Սանդերսը։

Ավելի վաղ Դոնալդ Թրամփը հայտարարել էր, որ Միացյալ Նահանգները պետք է ճանաչի Իսրայելի ամբողջական ինքնիշխանությունը Գոլանի բարձունքների նկատմամբ։ Հատկանշական է, որ Սպիտակ տունը և Պետքարտուղարությունը դեռ չեն մեկնաբանել Թրամփի այս հայտարարությունը։

1944 թվականից Սիրիային պատկանող Գոլանի բարձունքները Իսրայելի վերահսկողության տակ են անցել 1967 թ․ վեցօրյա պատերազմից հետո։ 1981 թվականին Քնեսեթն ընդունել է «Գոլանի բարձունքների մասին» օրենք, որով ամրագրվել է հրեական պետության ինքնիշխանությունը տվյալ տարածքի վրա։ Հենց այդ ժամանակ էլ Գոլանի բարձունքի բռնակցումն անվավեր է ճանաչվել  ՄԱԿ-ի Անվտանգության Խորհրդի 497 թվակիր բանաձևով։